Mae strôc yn gyflwr meddygol difrifol sy'n peryglu bywyd sy'n digwydd pan fydd y cyflenwad gwaed i ran o'r ymennydd yn cael ei dorri i ffwrdd.
Ar hyn o bryd mae unedau strôc ym mhob un o'r pedwar prif ysbyty: Bronglais, Glangwili, Tywysog Philip a Llwynhelyg. Fodd bynnag, nid yw’r gwasanaeth yn bodloni safonau clinigol ac nid oes digon o staff i'w gefnogi. Mae hyn yn arwain at ganlyniadau nad ydynt mor dda ag y gallent fod. Mae tystiolaeth yn dangos bod canlyniadau a safonau'n well os bydd gwasanaethau yn cael eu dwyn ynghyd a'u darparu o lai o ysbytai. Byddai dod â gwasanaethau at ei gilydd hefyd yn helpu gyda denu a chadw staff, gan wneud y gwasanaeth yn fwy cynaliadwy.
Yr opsiwn a ffefrir gennym yw uned strôc yn Glangwili gyda staffio arbenigol 24 awr, saith diwrnod yr wythnos. Byddai Bronglais, Tywysog Philip a Llwynhelyg yn dod yn ysbytai trin a throsglwyddo. Byddai cleifion strôc yn cael eu trosglwyddo i Glangwili o'r ysbytai hyn ar gyfer eu gofal strôc acíwt. Byddai cleifion sy’n agosach i Tywysog Philip a Llwynhelyg yn aros yn Glangwili i adsefydlu yn benodol ar gyfer strôc. Byddai uned adsefydlu strôc yn Bronglais, sy'n golygu y byddai cleifion sy’n byw’n agosach i Bronglais yn cael eu trosglwyddo yn ôl yno o Glangwili ar gyfer eu hadsefydlu yn benodol ar gyfer strôc.
