Ymunwch â’r sgwrs a rhannwch eich barn.

Credwn fod iechyd yn dechrau yn ein cartrefi, ysgolion, gweithleoedd a chymunedau, nid yn unig mewn clinigau neu ysbytai. Mae model cymdeithasol cryf yn golygu cydweithio â sefydliadau lleol a phartneriaid, clybiau a grwpiau i gefnogi llesiant. Mae pobl fel cysylltwyr cymunedol, gwirfoddolwyr a gofalwyr eisoes yn gwneud gwahaniaeth.

Rydym am adeiladu ar hynny trwy wrando ar yr hyn sydd bwysicaf i chi - boed yn gymorth gyda chludiant, mynediad at fannau gwyrdd, neu gefnogaeth gyda bwyd a gwresogi. Dylai iechyd fod yn rhan o fywyd bob dydd, wedi’i lunio gan y bobl sy’n ei fyw.

Gall gofal iechyd digidol wneud pethau'n haws, o drefnu apwyntiadau i wirio canlyniadau neu gael cyngor. Ond rydyn ni’n gwybod nad oes gan bawb yr un mynediad na’r un hyder. I rai, mae’n golygu cael y ddyfais neu’r cysylltiad rhyngrwyd cywir; i eraill, mae’n golygu ymddiriedaeth a gwybod bod eich gwybodaeth yn ddiogel. 

Rydyn ni eisiau i wasanaethau digidol deimlo’n syml, yn ddiogel, ac yn gefnogol - nid yn rhwystr. Mae hynny’n golygu cynnig hyfforddiant, gwneud gwasanaethau’n ddwyieithog, a chadw opsiynau wyneb yn wyneb bob amser i’r rhai sy’n ffafrio hynny. Dylai pawb deimlo eu bod wedi’u cynnwys.

Rydym yn gweithio i symud mwy o ofal i gymunedau, fel y gall pobl gael cymorth yn gynt ac yn agosach at adref.  Gallai hynny olygu mwy o staff gofal iechyd neu ganolfannau llesiant yn eich tref neu bentref. Os gwnawn hynny’n iawn, gall ysbytai ganolbwyntio ar yr achosion mwyaf difrifol.

Ond rydym hefyd yn gwybod bod teithio’n bwysig - yn enwedig mewn ardaloedd gwledig. Os oes angen i chi deithio ymhellach, rydym am wneud hynny’n haws: trafnidiaeth well, cyfathrebu cliriach, a sicrhau bod y gofal a gewch yn wirioneddol werth y daith. Mae’n golygu cydbwyso’r hyn sy’n ddiogel, yn gynaliadwy ac yn deg.

Ar draws ein cymunedau, rydym yn deall nad adeiladau yn unig sy'n bwysig o ran ansawdd gofal iechyd, ond y gofal a ddarperir ynddynt. Wedi dweud hynny, rydym yn gwybod y gall cyflwr ein safleoedd effeithio ar ba mor ddiogel, hygyrch a chroesawgar yw gwasanaethau. Dylai unrhyw fuddsoddiad yn ein hystâd iechyd adlewyrchu’r hyn sydd bwysicaf i chi: gofal amserol, amgylcheddau cefnogol, offer modern, a chyfleusterau sy’n helpu staff i wneud eu gwaith gorau.

Wrth i ni gynllunio ar gyfer datblygiadau yn y dyfodol, mae angen i ni wneud newidiadau yn y safleoedd sydd fwyaf angen eu hatgyweirio. Rydym wedi ymrwymo i wrando, bod yn dryloyw, a gweithio gyda chymunedau i sicrhau bod gwelliannau’n cefnogi gwell gofal i bawb.