Clwstwr Gogledd Sir Benfro

Beth sydd ar gael i fy helpu gyda fy iechyd a lles yng Ngogledd Sir Benfro? 

Mae ardal Gogledd Sir Benfro yn ffinio â Sir Gaerfyrddin i'r dwyrain, Ceredigion i'r gogledd-ddwyrain, a'r arfordir. Hwlffordd yw tref fwyaf yr ardal ac mae'r sir yn gartref i Barc Cenedlaethol Arfordir Penfro.

Mae llawer o wasanaethau wedi’u lleoli yng Nghlwstwr Gogledd Sir Benfro a all eich cefnogi gyda’ch iechyd a’ch lles.

Beth yw Clwstwr?

Weithiau byddwch yn clywed eich ardal yn cael ei disgrifio fel ‘Clwstwr’. Mae hwn yn disgrifio sut mae llawer o wasanaethau lleol sy'n ymwneud ag iechyd a gofal mewn ardal ddaearyddol yn cydweithio. Y nod yw cydgysylltu llesiant pobl a chymunedau yn well.

Mae gan Glwstwr Gogledd Sir Benfro boblogaeth o 66,854 o bobl a thua 29,7000 o aelwydydd.

Mae gan Glwstwr Gogledd Sir Benfro: 

• 17 fferyllfa gymunedol
• 8 practis optometreg (optegwyr)
• 11 deintyddfa
• 8 practis meddyg teulu
• 1 ysbyty (Ysbyty Llwynhelyg)
• 35 cartref nyrsio a phreswyl
• 4 rhwydwaith cymunedol integredig

Gallwch ddarganfod sut y gall rhai o’r gwasanaethau hyn eich helpu, a pha un sydd orau i’ch helpu mewn gwahanol amgylchiadau, drwy fynd i’n hadnodd gwe a chyfres fideos Fy Iechyd, Fy Newis yma (agor mewn dolen newydd).

Mae amrywiaeth o wasanaethau cymunedol eraill sy’n gallu darparu gofal a chymorth yn eich cartref eich hun neu’n agos ato.

Y nod yw darparu'r rhan fwyaf o'ch gofal mor agos i'ch cartref â phosibl. Gall hyn eich cadw’n iach am fwy o amser ac osgoi gorfod teithio i’r ysbyty pan nad oes angen. Mae'r timau hyn yn helpu i'ch cael chi adref o'r ysbyty yn gyflymach, pan fyddwch chi'n barod.

Rydym hefyd am i chi gael eich cefnogi i wneud dewisiadau am eich iechyd a'ch lles eich hun a chael eich grymuso a'ch cefnogi i fyw bywyd o'r ansawdd gorau.

Am ein poblogaeth 

Mae llawer o’n hardal yn wledig, gyda phocedi trefol, ac mae gennym ni fwy o bobl hŷn yn byw yma na rhannau eraill o’r wlad.

Mae pobl yn byw gyda phroblemau iechyd lluosog. Mae hyn yn golygu y gallant fod angen iechyd a gofal am lawer o wahanol resymau, a chan wahanol weithwyr proffesiynol ar yr un pryd.

Yng Nghlwstwr Gogledd Sir Benfro rydym yn gwybod mai’r risgiau/cyflyrau iechyd mwyaf yw:

• pwysedd gwaed uchel
• diabetes
• ashma

Isod mae rhai enghreifftiau o brosiectau a ariennir gan y clwstwr sy'n anelu at gefnogi iechyd a lles y boblogaeth leol hon.

• Gwasanaeth Ffisiotherapi Cyswllt Cyntaf mewn Meddygfeydd i alluogi cleifion i gael mynediad amserol a phriodol at wasanaethau Cyhyrysgerbydol (MSK).
• Prosiect Iechyd Traed Diabetig i wella gofal diabetes mewn pobl sy'n gaeth i'r tŷ a phobl sy'n profi digartrefedd neu ansicrwydd tai. Bydd y tîm hefyd yn chwilio am y rhai nad ydynt yn mynychu ar gyfer adolygiad diabetes ac yn ymgysylltu'n rhagweithiol â nhw.
• Timau Amlddisgyblaethol Cydgysylltwyr Gofal i nodi anghenion pobl yn gynharach trwy gynllunio gofal aml-broffesiynol a threfniadol a darparu cymorth.